Bashkia e Tiranës ka njoftuar mbledhjen e Këshillit Bashkiak ditën e hënë, 18 maj, ku në rend dite do të jenë planet për Teatrin Kombëtar.
Në një njoftim për mediat, Bashkia bën me dije se mbledhja do të mbahet në orën 11:00 dhe se do të diskutohet projekti për ndërtimin e godinës së re të Teatrit Kombëtar.
Ndërkohë anëtarëve të Këshillit Bashkiak i është shpërndarë një pr/vendim ku përcaktohet shembja e godinës aktuale të Teatrit Kombëtar, shoqëruar dhe me relacionin përkatës.
Pr/vendimi mban datën e 13 maj 2020 dhe firmën e kryetarit të Bashkisë Erion Veliaj dhe i është dërguar kryetarit të këshillit bashkiak Toni Gogu.
Përmes vendimit kërkohet miratimi i shembjes së godinës, në pronësi të bashkisë së Tiranës bazuar në akt ekspertizën e hartuar nga Instituti i Ndërtimit mbi vlerësimin e godinës së Teatrit Kombëtar.
Çuditërisht edhe pr/vendimi i firmosur nga Veliaj, ashtu edhe akt-ekspertiza e Institutit të Ndërtimit mbajnë të njëjtën datë, 13 majin 2020.
Në pikën dy të vendimit kërkohet që të merren të gjitha masat e nevojshme për nisjen dhe ndjekjen e procedurës së ndërtimit të godinës bashkëkohore dhe me standarde të Teatrit Kombëtar.
Në pikën 4 të vendimit thuhet se në mbështetje do të jetë policia bashkia, Drejtoria e Përgjithshme e Objekteve Publike, Drejtoria e Përgjithshme e Pastrimit dhe Gjelbërimit , Drejtoria e Përgjithshme e Rrugëve dhe Ndriçimit Publik, Agjencia e Parqeve dhe Rekreacionit, mbështesin Inspektoriatin e Mbrojtjes së Territorit për ndërhyrjen dhe prishjen e objekteve.
Ideja për shembjen e godinës së Teatrit Kombëtar u hodh nga Edi Rama në kohën që ishte ministër i Kulturës në vitet 1998-1999. Më pas si Kryebashkiak i Titanës vijoi me të njëjtën ide, ndërsa sot si Kryeministër vijon të këmbëngulë për shembjen. Dhe pasi dështoi prej dy vitesh, pas rezistencës së shoqërisë civile dhe artistëve, tashmë këtë detyrë ia ka ngarkuar Erjon Veliajt, që duket se po tenton të shkojë drejt një përplasjeje.
