Policia e Durrësit njoftoi sot se i ka vendosur një masë administrative kreut të PD-së, Lulzim Basha, por edhe i ka hequr patentën, apo lejen e drejtimit të mjetit.
Sipas një njoftimi zyrtar, përveç kreut të PD-së, që policia e identifikon me inicialet L.B janë gjobitur dhe u është hequr patenta edhe 10 qytetarëve të tjerë.
Sipas policisë, këta qytetarë kanë zhvilluar një aktivitet partiak në mjedisin e mbylluar të një lokali, në kundërshtim me Aktin Normativ “Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19”.
“Bazuar mbi Aktin Normativ, është marrë masë administrative 1 milionë lekë për pronarin e lokalit, shtetasin A.H.
Njëkohësisht janë ndëshkuar me masë administrative gjobë dhe me tërheqje të lejes së drejtimit shtetasit pjesëmarrës në këtë aktivitet, L.B, F. Xh., A. M., R. G., A. B., V. N., E. H., A.B., D. B., J.M. dhe A.H”, thuhet në njoftimin e policisë.
