Sekretari i Përgjithshëm i PD, Gazment Bardhi, ka treguar sot me emra, disa prej oligarkëve më të mëdhenj të vendit, që sipas tij, Rama i ka në zyrë, edhe pse i mohon. Bardhi ka shpjeguar edhe se si përfitojnë ata. Më poshtë, pjesë nga intervista e numrit dy të PD, për emisionin “Tempora” të Sonila Meços.
Pyetje: A ka oligarkë në Shqipëri? Rama tha jo.
“Oligarkët, natyrisht që ekzistojnë. Ata janë në zyrën e Edi Ramës dhe, bashkë me të zhvasin paratë nga buxheti i shtetit.”-deklaroi Bardhi.
Pyetje: Mund të na përmendni disa emra?
“Mund ta nisim me koncesionet apo PPP e inceneratorëve, ku Klodian Zoto që në llogarite bankare ka vetem 1 mijë euro, përfiton rreth 400 mln euro nga 3 koncesione/PPP. Buxheti i shtetit i jep para pa nisur puna në këto inceneratorë dhe kur jemi në situatë si kjo e pandemisë, kur qytetarët kanë nevojë për mbështetje ekonomike, ngre duart dhe thotë nuk kemi para për shqiptarët.”-u shpreh Sekretari i Përgjithshëm i PD.
Pyetje: Më thoni një emër tjetër, pa bërë një analizë kaq të gjatë.
“Një tjetër oligark është ai që takson qytetarët shqiptarë për një rrugë publike, siç është kompania “Kastrati”, i cili ka marrë koncesionin e Rrugës së Kombit.”-u shpreh Bardhi.
Pyetje: Ndërsa ju thoni emra, ka një akuzë nga Erion Veliaj, që shprehet se Basha u vendos gjoba atyre që i quan oligarkë.
“Nëse ka një gjobaxhi dhe një person që është i lidhur jo vetëm me oligarkët, por edhe me grupe të rrezikshme kriminale që pastrojnë paratë në sektorin e ndërtimit, ai është kryebetonieri në krye të Bashkisë së Tiranës, Erion Veliaj.”-deklaroi Bardhi.
A ekziston rreziku i varesisë së PD nga ky grup oligakrësh, të cilët i kanë rezistuar pushteteve?
“Zero varësi. Varësia krijohet në 2 drejtime. Së pari, që të na mbyllin gojën për telë denoncuar aferat ku janë përfshirë. Nuk ka shqiptar të besojë se PD ka mbyllur gojën për ndonjë aferë korruptive. Është opozita, kryesisht PD, ajo që i ka qendruar ballazi çdo aferë korruptive. Drejtimi i dytë është pranimi i financimeve në partinë politike nga këta oligarkë. Si Sekretar i Përgjithshëm po të konfirmoj se, të paktën që nga koha për të cilën unë jam në ketë detyrë, PD pranon zero financime nga këta oligarkë.”-tha Bardhi.
