Epidemiologu Alban Ylli tha se shanset për rikthimin e pandemisë me këto përmasa në vjeshtë apo dimër janë të vogla.
Ylli tha se me shumë gjasa ky virus do të kthehet në endemik, ashtu si edhe koronaviruset e tjera.
Sipas epidemiologut, masat e marra bënë që të mos kishte një përhapje të gjerë të virusit jo vetëm në Shqipëri, por në të gjitha vendet që patën kohë që të marrin masat, pasi panë atë që po ndodhte në vendet që u goditën të parat.
“Nuk ka ndodhur kurrë në rastet e epidemive që të ketë kaq shumë informacione sa në rastin e Covid-19. Virusi nuk ka pasur shpërndarje të njëjtë në të gjitha rajonet apo vendet, për shkak të masave që janë marrë”, tha Ylli.
I pyetur se kur ka hyrë virusi në Shqipëri, epidemiologu tha se në periudhën janar-shkurt nuk ka pasur një qarkullim intensiv të virusit.
“Nëse do të ishte kjo, atëherë do të përmbysnim të gjithë përhapjen e virusit në të gjithë Botën. Në Rusi u zbuluan 3 raste në janar, por ato ishin të izoluara, ndërsa pandemia u shtri atje në 2 mars. Mendoj se në Shqipëri ka hyrë nga Italia në fundin e shkurtit dhe fillimin e marsit. Ne s´mund të jemi vendi i vetëm në Europë me pikun në janar-shkurt”, tha Ylli.
