Për vitin 2019 ka shënuar ulje si numri i hetimeve nga Prokuroritë në gjithë territorin për veprën penale të pastrimit të parave, ashtu si dhe numri i të dënuarve. Scan ka zbardhur të dhënat zyrtare të Prokurorisë së Përgjithshme, nga të cilat mësohet se në vitin 2019 janë regjistruar në total 236 procedime për këtë grup veprash penale, 12.2% më pak se në vitin 2018, kur numri i tyre ishte 269.
Në lidhje me të pandehurit, për këtë grup veprash penale, vihet re ulje e numrit të të pandehurve të regjistruar me 18 %, numri i të pandehurve të cilët janë dërguar në gjykatë është ulur me 16,07 % ndërsa numri i të pandehurve të dënuar nga gjykata është ulur me 18,52 % përkundrejt vitit 2018. Në total për vitin 2019, rezultojnë vetëm 22 të dënuar për këtë grup veprash penale, 13 prej të cilëve të dënuar për Përvetësimin e parave ose mallrave që rrjedhin nga vepra penale ose veprimtaria kriminale.
Numri më i lartë i procedimeve të regjistruara për këtë vepër penale është në prokurorinë pranë gjykatës së shkallës së parë Tiranë, që përbën 27 % të numrit total të procedimeve në shkallë vendi. Në prokuroritë pranë gjykatave të shkallës së parë Durrës, Fier, Elbasan e Vlorë janë
regjistruar përkatësisht 8 % e numrit total të procedimeve, në prokurorinë pranë gjykatës së shkallës së parë Berat janë regjistruar 7 % e numrit total të procedimeve në shkallë vendi, në prokurorinë pranë gjykatës së shkallës së parë Shkodër janë regjistruar 6 % e numrit total të procedimeve në shkallë vendi. /SCAN.
