Ndërsa në Spanjë dhe Portugali po bëhen gati për rifillimin e sezonit 2019-2020, coronavirusi vazhdon të mbetet një kërcënim real për skuadrat e futbollit në këto vende.
Së fundmi në dy vendet iberike janë zbuluar 6 raste të reja me coronavirus, 3 në Spanjë dhe 3 në Portugali aty ku është zyrtarizuar fillimi i kampionatit në fund të këtij muaji.
Në Portugali, klubi i prekur është Vitoria Guimaraes, ndërsa janë konfirmuar pozitiv me COVID-19, tre futbollistë. Klubi portugez bën me dije se ata janë të gjendje të mirë dhe nuk kanë simptoma, ndërkohë që po qëndrojnë të izoluar nga pjesa tjetër e skuadrës.
Në Spanjë situata është më e vështirë ku ditët e fundit ka pasur disa lojtarë të prekur nga virusi famëkeq. Tre rastet më të reja paraqiten te klubi i Real Betis. “El Larguero” raporton se pas testimeve tre futbollistë kanë dalë pozitivë, ndërkohë që dy prej tyre nuk kanë simptoma.
