Një denoncim konkret ka mbërritur në adresë të Kryeministrit nga një gazetare, lidhur me largimin nga puna të dy familjarëve të saj, që punonin në Report TV, televizionin e Carlo Bolinos, që njihet për mbështetjen që i ka dhënë dhe i jep Kreut të Qeverisë, Kryebashkiakut të Tiranës, dhe Rilindjes në tërësi.
Gazetarja Ina Qirjo, shkruan në rrjetet sociale, duke iu drejtuar Edi Ramës, drejtuesit e televizionit, pasi i kanë hequr nga puna dy pjesëtarë të familjes së saj, nuk kanë pranuar të aplikojnë për bonusin për punonjësit, duke e lënë edhe pa para në mes të pandemisë.
“Z. Kryeministër po ata që kanë punuar në media (Report Tv) dhe i kanë pezulluar gjoja për dy javë për arsye ekonomike si pasojë e Covid 19 , e që janë lajmëruar më pas se duhet të firmosin kontraten për shkeputje nga puna që në muajin mars, si i bëhet?
Një gjë e tillë i ka ndodhur dy pjesëtarëve të familjes time që punonin në këtë televizion (Report tv), pra i kanë larguar nga puna! Nga ana jonë i është kërkuar përfaqësuesve të TV të bëjnë aplikimin dhe nuk kanë pranuar!!!
Ju lutem një përgjigje nga ana juaj!”, shkruan gazetarja, duke i kërkuar reagim Kryeministrit.
Por, Kreu i Qeverisë, i cili parapëlqen të debatojë me ndjekësit në rrjet, në rastin konkret ka preferuar të mos kthejë një përgjigje. Ndoshta për shkak edhe se akuza drejtohej nga Bolino, pronari i TV Report, që ka përfootuar jo pak nga Qeveria Rama.
Dhe në vend të përgjigjes nga Kryeministri, po në rrjetet sociale, është bërë një reagim nga stafi i televizionit.
Ky i fundit pretendon se denoncimi i gazetares nuk është i vërtetë, madje thuhet se janë të gatshëm të përballen edhe me gjyq për këto akuza.
Në reagimin e Report TV thuhet se Ina Qirjo ka kërkuar fillimisht leje për arsye shëndetësore dhe nuk ka sjellë asnjëherë raport mjekësor që ta vërtetojë këtë gjë. Televizioni thekson se ka pritur dy javë për kthimin e spikeres, por më pas ajo kishte njoftuar se nuk do të kthehej më në punë. Përsa u përket pagesave, Report TV, shkruan se është treguar i rregullt me të gjithë punonjësit. Për të motrën, televizioni shkruan se është njoftuar nga prindërit e vajzave se ajo kishte frikë të shkonte në punë.
Në debat është përfshirë edhe gazetari Artan Hoxha, i cili dikur ka punuar në Report TV, porn ë rastin konkret ka mbështetur pretendimet e gazetares Ina Qirjo.
Hoxha shkruan se rasti i gazetarëve të “dorëhequr” nuk është i vetmi që ka ndodhur këto kohë në televizion dhe me shumë mundësi të gjithë do aplikojnë tek e-Albania.
