Avokati Ledio Braho ka komentuar në “Euro News Albania” ndryshimet në Kodin Penal për situatën e COVID-19 që hynë në fuqi prej ditës së sotme.
Sipas tij, prpblematika më e madhe qëndron në procedurën e përshpejtuar të ndjekur nga Parlamenti e cila është anti kushtetuese dhe kjo është e pamundur të dërgohet në Gjykatën Kushtetuese pasi ajo është jo funksionale.
“Nuk është çështja vetëm te masta dhe burgimi që është deri në 8 vjet, problematika kishte të bënte dhe me procedurën e ndjekur nga Parlamenti e cila ishte antikushtetuese, pasi ishte procedurë e përshpejtuar. Sot, kanë hyrë këto ndryshime në kodin penal dhe është e pamundur që këto të dërgohen në Gjykatë Kushtetuese, pasi kjo nuk është funksionale, pra këto janë të zbatueshme nga sot e në vazhdim.
Ajo çka është e rëndësishme, që ka të bëjë me nenin e parë me kundërshtimin e akteve ligjore ose nënligjore, duhet që së pari të kesh një dënim administrativ dhe masa e dytë nëse t’i kryen sërish shkelje të këtyre rregullave të vendosura nga qeveria, atëhere je në kushtetet e konsumit të një vepre penale që është për qytetarët është dënim me gjobë ose burgim deri në 6 muaj. Dënimet administrative do të kryehen nga dita që hyjnë në fuqi ndryshimet në Kodin Penal, pra nuk quhen ndryshimet administrative të marra më parë. “ – u shpreh avokati.
Më tej, Braho shtoi se nëse do të sfidosh masat, duhet të ndjekësh të gjitha shkallët e gjyqësorit në Shqipëri dhe se Gjykata e Strasburgut duhet e pakta 4-5 vjet për të marrë një vendim nëse e ankimon pasi nuk e ka prioritet.
“Nuk e shoh problemin më shume me qytetarët sesa me bizneset sepse janë vënë një sërë rregullash për bizneset, dhe problematika do jetë me bizneset që kanë masën e dënimit më të madhe që është deri në dy vjet.
Nëse do t’i sfidosh këto masa në gjykatë, Gjykata e Strasburgut është alternativë pasi të jenë konsumuar të gjitha shkallët e gjyqësorit në Shqipëri. Ajo do mund të japi vendime së paku për nje harku kohor për 4 ose 5 vjet, pasi nuk i ka prioritet. Tani mund t’i drejtohesh Gjykatës Administrative dhe më pas hallkat e tjera. Ndërkohë me krijimin e Gjykatës Kushtetuese edhe Shoqëria Civile duhet t’i drejtohen Gjykatës Kushtetuese, në lidhje me këto ndryshime që janë bërë.” tha Braho.
Avokati shtoi se këto dënimet me burg nuk janë të zbatueshme pasi COVID-19 ende nuk është klasifikuar si sëmundje me rrezikshmëri të lartë.
“COVID-19 ende nuk është klasifikuar si sëmundje me rrezikshmëri të lartë dhe kështu nuk është e zbatueshme nëse flasim për nenin 2 që ka burgim dy deri në tre vjet apo tre deri në tetë vjet.” th Braho.
