Presidenti Ilir Meta deklaroi këtë të Premte se autoritetet duhet të respektojnë të drejtën e protestës në çdo kohë.
Pasi mori pjesë në një seancë dhurimi gjaku në Bibliotekën e Fakultetit të Gjuhëve të Huaja në Tiranë, kreu i shtetit dha një prononcim për gazetarët. Meta u pyet lidhur me protestën e një dite më parë në Tiranë dhe procedimet penale të nisura nga policia.
Kreu i shtetit tha se e drejta për të protestuar është një e drejtë që duhet respektuar nga autoritet në çfarëdolloj situate. “Lidhur me çështjen e protestave, tubimeve dhe manifestimeve, Kushtetuta e garanton këtë të drejtë themelore që është fondamentale për ekzistencën e demokracisë. Është një e drejtë që duhet respektuar nga autoritetet. Duke qenë se jemi në situatë të veçantë duhen marrë të gjitha masat jo që të ndalohet por të zhvillohet në përputhje me kushtet specifike të distancimit social dhe ruajtjes së sigurisë dhe duhet të jenë paqësore”, tha Meta.
“Dhe duhet të jenë paqësore, shpresoj që kjo duhet të ndodhë në të ardhmen”, shtoi ai.
Një ditë më parë, disa qytetarë protestuan në qendër të Tiranës, duke kërkuar heqjen e masave kufizuese të marra sipas autoriteteve, me qëllim parandalimin e përhapjes së COVID. Policia ndërhyri për të shpërndarë protestën, duke shoqëruar me dhunë disa qytetarë. Këtë të Premte, njoftoi zyrtarisht procedimin penal të 7 personave.
Lidhur me rastin reagoi dhe PD, duke u shprehur se qytetarëve po u cënohen të drejtat me lehtësi, nga regjimi i Edi Ramës.
Një nga të proceduarit ishte Sazan Guri. Ai argumentoi pse sipas tij, Policia po vepron në mënyrë të kundërligjshme me protestuesit dhe pse mbyllja e qytetarëve është e paligjshme.
