A është Saimir Tahiri apo Geron Xhafaj subjekt i ligjit të OFL-së, ishte pyetja që gazetarja Klodi Lala i drejtoi zv.ministrit të Brendshëm, Julian Hodaj.
Zv. Ministri i Brendshëm i është shmangur një përgjigjeje të drejtpërdrejtë, prat ë pohonte ose mohonte nëse ish-ministri i Brendshëm Sajmir Tahiri dhe Geron Xhafaj, vëllai i ish-ministrit të Brendshëm, Fatmir Xhafaj, janë subjekte të ligjit të OFL.
Hodaj tha se subjekt të ligjit janë ata që janë dënuar për një vepër penale, e parashikuar në ligjin e OFL, brenda apo jashtë vendit
“Nuk jap përgjigje për emra konkretë, ne analizojmë çështjet, jo individët. Për emra konkretë duhej të pyesni policinë”, tha Hodaj.
E ndërsa foli për rreth 100 dosje që janë depozituar në SPAK nga OFL, në rastin konkret ai preferoi të shmagej nga një përgjigje e drejtpërdrejtë.
Ndoshta Hodaj, për shkak edhe të pozicionit që mban si zv.ministër, ka frikë të pohojë ose mohojë, nëse një ish-ministër që shpallej si kampion i Rilindjes në luftës ndaj krimit, dhe vëllai i ish-ministrit të Brendshëm, që drejtoi edhe reformën në drejtësi, Fatmir Xhafajt, janë subjekte të ligjit të OFL.
Në situata të tilla do të ishte më e ndershme që Hodaj ose të mos dilte të fliste për çështjet që nuk ka me “qejf” ti prekë, dhe fare mirë mund të flasë se si policia luftoi Covid-19, ose të marrë rolin e zyrtarit që duhet të përballet me çdo pyetje.
Sa për t’ia kujtuar zv.ministrit të Brendshëm Sajmir Tahiri u dënua nga Gjykata Krimeve të Rënda me 3 vite për shpërdorim detyre për shpërdorim të detyrës, pasi ai nuk arriti të parandalojë fenomenin e kanabizimit, duke mbajtur njëkohësisht kontakte me vëllezërit Habilaj, të lidhur me trafikun e drogës.
Ndërkohë që Geron Xhafaj është i dënuar në Itali për trafik të narkotikëve dhe u detyrua të shkojë në vuajë dënimin me burg në vendin fqinj.
A përfshihen këto vepra penale te ligji i OFL, z. zv. ministër i Brendshëm?
