Gjykata e Posaçme nuk e ka ndryshuar masën e sigurisë “arrest në burg” dhënë në mungesë për shtetasin Arjol Halilaj.
29-vjeçari akuzohet për “përkrahje të autorit të krimit”, pasi dyshohet të ketë ndihmuar autorët e atentatit ndaj prokurorit të Durrësit, Arjan Ndoj, ngjarje e ndodhur në 1 nëntor 2019.
Në atentatin pranë mbikalimit të Shkozetit, në aksin Durrës-Tiranë, u plagos prokurori, shtetasi Aleksandër Laho, i njohur si “Rrumi i Shijakut”, dhe shoferi Andi Maloku, i cili ndërroi jetë pas disa ditësh në spital.
Sipas hetimit të SPAK, Halilaj është tradhëtuar nga komunikimet telefonike me Redian Rrajën, i arrestuar si një nga atentatorët dhe pamjet e një kamere sigurie.
Hetuesit pretendojnë se ditën e ngjarjes, Arjol Halilaj është takuar në Durrës me Rrajën dhe një person tjetër, të cilët kanë mbajtur në mbikqyrje lëvizjet e prokurorit.
Teksa i janë vënë në ndjekje prokurorit në rrugën Durrës-Tiranë, 29-vjeçari ka shoqëruar lëvizjen e tyre si eskortë nga një automjet “Hyundai”. Ai i ka parakaluar gjatë rrugës dhe i ka pritur në zonën e Shkafanes, pranë vendit ku u gjet i braktisur automjeti i atentatorëve.
Lëvizjet e automjeteve janë fiksuar nga disa kamera sigurie të administruara nga hetuesit. Por, sipas burimeve nga grupi hetimor, duket se prova kryesore është ajo e siguruar nga një kamera, ku atentatorët kanë hipur në mjetin “Hyundai”.
Në këto pamje, sipas burimeve, një nga autorët e dyshuar, tashmë i arrestuar, mban një kapele në kokë, ndërsa personi tjetër një send në duar.
Pas këtij momenti, Halilaj i ka shoqëruar ata drejt qytetit të Durrësit. Në mjetin “Mercedes” të përdorur nga autorët, i lënë i padjegur, u gjetën maska, lëndë djegëse dhe dy kallashnikovë të përdorur në ngjarje.
Nga hetimi janë identifikuar dhe të paktën dy persona të tjerë të përfshirë në ngjarje, të cilët po kërkohen nga policia.
