Urdhëri i ministres së Arsimit, Besa Shahini, për kthimin e studentëve në auditorë është kundërshtuar nga Asambleja e Universitetit të Shkodrës.
Gjashtë anëtarë të Asamblesë të Universitetit Luigj Gurakuqi të Shkodrës, janë shprehur kundër vendimit të Ministrisë së Arsimit për rikthimin në auditorë të studentëve.
Sipas tyre Ministria tejkalon kompetencat dhe urdhri bie ndesh me vendimin e Asamblesë të Universitetit të Shkodër.
“Të anulohet Urdhri i Ministrisë së Arsimit që parashikon kthimin e studentëve dhe pedagogëve në salla, si një rrezik për shëndetin dhe jetën e tyre, por edhe për qytetin e Shkodrës.
Ky urdhër e ka bërë më të paqartë situatën në universitetet publike. Ai cënon strukturën e vitit akademik, që përcaktohet duke u mbështetur në Rregulloren e Studimeve dhe Statutin e Universitetit të Shkodrës. Ministria tejkalon kompetencat e saj të sanksionuara me ligj si organ epror, duke dërhyrë në kompetencat e IAL, në mënyrë të tepruar dhe diktuese”, thuhet në kërkesën e Asamblesë së Universitetit të Shkodrës.
Madje, ata paralajmërojnë se nëse Shahini nuk tërheq vendimin, pedagogët e Universitetit Luigj Gurakuqi kanë vendosur ti drejtohen gjykatës.
“Të mos preket struktura e vitit akademik 2019-2020. I gjithë procesi të mbyllet online pa praninë fizike të studentëve e pedagogëve në salla. Në rast të kundërt do t’i drejtohemi gjykatës, mbështetur në ligjin për fatkeqësinë natyrore që ndalon grumbullime në ambiente të mbyllura”, thuhet ndër të tjera në këtë kërkesë.
Gjithashtu Asambleja e Universitetit të Shkodrës kërkon shtyrjen e procesit të zgjedhjeve për shkak se studentet dhe pedagogët nuk janë fizikisht në universitete.
Gjithashtu nuk ka asnjë mundësi që kandidatët për pozicionet drejtuese të zhvillojnë fushatën.
