Testimet e fundit klinike për Remdesivirin, një ilaç antiviral i prodhuar fillimisht për të kuruar Ebolan, kanë qenë inkurajuese.
Instituti Amerikan për Sëmundjet Infektive dhe Alergjike, zbuloi se ilaçi e shkurton kohën e simptomave nga 15 në 11 ditë.
Në testime u përfshinë 1.063 njerëz në spitale në mbarë botën. Disave iu dha ilaçi, të tjerë morën placebo, një trajtim mashtrues.
Dr. Anthony Fauci, që drejton institutin, tha se Remdesivir ka një efekt të qartë, pozitiv në shkurtimin e kohës së shërimit.
Megjithatë, edhe pse Remdesivir mund të ndihmojë në shërimin- dhe ndoshta mund të pengojë që njerëzit të shtrohen në shërbimin intensiv- testimet nuk kanë dhënë ndonjë provë të qartë nëse ai ndalon vdekjet nga koronavirusi.
Ai është një nga katër ilaçet e testimeve të solidaritetit nga OBSH dhe këto prova janë realizuar nga prodhuesi i tij, Gilead.
Të dhënat e SHBA për Remdesivirin janë publikuar në të njëjtën kohë me një testim të ilaçit në Kinë, që tregoi se ai nuk është efektiv.
Megjithatë, ai testim nuk ishte i plotë për shkak të suksesit të izolimit në Ëuhan, që do të thotë se mjekët nuk kishin pacientë./James Gallagher, BBC
