Dom Gjergj Meta tha mbrëmjen e sotme në “Opinion” se përveç rrezikut real nga Covid-19, shqiptarët kanë edhe një tjetër rrezik të madh dhe real varfërinë me të cilën po përballen.
“Në bashkinë e Mirditës, që ka 22 mijë banorë, dhe që gjenden 2 mijë familje që kërkojnë qesen e ndihmave, është shumë e trishtë. Familjet e varfra janë në një nevojë reale dhe ka shumë familje që i janë shtuar pragut të varfërisë”, tha Dom Gjergj Meta.
Sipas tij, zgjidhja e çështjes së varfërisë nuk është as me qese as me fushata, por duhet një program i qartë, që të analizojë të gjitha situatat.
“Ne kemi konstatuar një realitet, varfërinë, ndërsa ekspertët duhet të hartojnë strategjinë, pasi çështja nuk është ti çosh sot 1 kg miell apo një qese me ushqime”, tha Dom Gjergj Meta.
Lidhur me masat e karantinës, ai shtoi se varfëria dhe izolimi ka ndikuar në shëndetin mendor të njerëzve.
“Të mos harrojmë se shqiptarët u përballën me tërmetin dhe tani me pandeminë. Po të shtojmë këtu edhe varfërinë, atëherë të gjitha këto kanë ndikuar në shëndetin mendor të shumë individëve, përfshi këtu edhe moshën e tretë”, tha ai.
