Politikani Neritan Ceka i konsideron masat e Qeverisë në kuadër të epidemisë së Covid-19 si ekstreme, ndërsa thekson se edhe ndryshimet në Kodin Penal janë të pazbatueshme.
“Këto masa janë propagandë e panevojshëm për këtë kohë. Masat që janë parashikuar janë ekstreme dhe janë dhunë, në kufijtë e Kushtetutës. Presidenti ka dhënë një shenjë të vullnetit të mirë, por në raste të tjera nuk do t’i miratonte”, tha ai.
Ceka shprehet për Oranews se zonat që nuk janë prekur nga koronavirusi duhet të hapen, sikundër ka ardhur koha që i gjithë vendi të shkojë në këtë drejtim.
“Ajo që pësoi më shumë Shqipëria në këtë periudhë, ishte informaliteti. Një pjesë e mirë është e punësuar në mënyrë informale dhe në këtë periudhë ata janë gjendur të papunë dhe kanë hasur vështirësi. Shpresoj që të shkojmë drejt hapjes, mendoj se ka ardhur koha për tu hapur, sidomos zonat që nuk janë prekur. Mendoj që vetë shifrat, japin mundësi që të ketë një hapje më të shpejtë të ekonomisë”, shprehet Ceka.
Për politikanin e vjetër, ajo që duhet të bëhet në këtë periudhë është heqja e gjobave, madje ai propozon një amnisti fiskale jo për ata që kanë grumbulluar para jashtë Shqipërisë, por për ata që janë gjobitur.
