Pedagogu dhe aktivisti Erion Kristo përmes një postimi në rrjetet sociale i është drejtuar Komisionerit për Mbrojtjen nga diskriminimi dhe Avokatit të Popullit me disa pyetje lidhur me aplikimin e lejeve të liridaljeve në kohën e gjendjes së fatkeqësisë natyrore.
Kristo pyet nëse është diskriminues ose jo moslejimi i fëmijëve mbi 10 vjeç për të dalë nga shtëpia në fundjavë, moslejimi i grave që s´kanë fëmijë nën 10 vjeç apo i burrave, gjatë fundjavave.
Reagimi i pedagogut vjen në një kohë kur gjatë fundjavave i jepen leje pensionistëve për të dalë të shtunave deri në orën 11:00, si dhe nënane me fëmijë 10 vjeç për të dalë të dielave deri në orën 11:00.
Postimi nga Erion Kristo
Thirrje publike drejtuar Avokatit të Popullit dhe Komisionerit për Mbrojtjen nga diskriminimi.
Përshëndetje. Po ju drejtohemi me disa pyetje:
A është diskriminim moslejimi i fëmijëve mbi 10 vjeç për të dalë nga shtëpia në fundjavë?
A është diskriminim moslejimi i burrave dhe baballarëve për të dalë nga shtëpia në fundjavë?
A është diskriminim moslejimi i grave që nuk kanë fëmijë nën dhjetë vjeç për të dalë nga shtëpia në fundjavë?
Na ktheni përgjigje për këto pyetje. Nëse është diskriminim, tregoni zbatimin e ligjit për personat përgjegjës. Nëse nuk është, duam argumentimin përkatës. Faleminderit.
P.S. Ju bëj thirrje të gjithë njerëzve që duan përgjigje për këto pyetje, që ta mbështesin dhe përhapin këtë postim. Duhet t’i detyrojmë të përgjigjen duke reaguar të gjithë bashkë.
