Ministrja e Financave, Anila Denaj, tha mbrëmjen e sotme se nga paketat ndihmëse të caktuara nga Qeveria, do të përfitojnë ato që kanë mbetur pa punë si rezultat i masave të marra nga Qeveria.
Denaj tha se nëse ka punonjës që mund të kenë punuar, por nëse ata përfitojnë pagën nga punëdhëni i tyre, atëherë nuk do të marrin atë që quhet “paga e luftës”.
Sipas ministres së Financave, asnjë punonjës nuk mund të përfitojë edhe pagën e luftës edhe pagën nga biznesi.
Ndërkohë ajo sqaroi se pagesat për sigurimet shoqërore nuk do të shtyhen.
Në emisionin Opinion, Denaj tha se të gjitha adresimet që janë përfshirë në paketë janë marrë nga Tatimet.
“Në paketën e dytë janë 100 mijë persona, ndërsa në paketën e parë janë mbi 60 mijë persona”, tha Denaj.
Në vijim ajo tha se Task Force ka vendosur shëndetin mbi ekonominë, dhe bazuar kësaj ne marrim vendimet lidhur me hapjen e bizneseve.
Sipas saj, bizneset që kanë marrë pagën e luftës nuk janë subjekt i garancisë bankare, ndërsa të gjitha të tjerat janë.
