Në një lidhje direkt në “Instagram”, Fabio Cannavaro, foli gjatë rreth kujtimeve më të spikatura të tij si futbollist.
Ndër të tjera ai kujtoi eksperiencën e tij me Juventusin dhe titujt e anuluar për shkak të skandalit të “Calciopoli”, si dhe largimin nga bardhezinjtë.
“Pengu lidhur me Juventusin është se gjithçka ndodhi pas dy vitesh, në të cilën kisha bërë paraqitje të shkëlqyera. Keqardhja qëndron në faktin se nuk qemë në gjendje t’i shijojmë dy tituj, që i djersitëm aq shumë në fushë. Ne dhamë maksimumin, vuajtëm, u gëzuam. Ishte një ekip kaq i fortë, saqë kur ndodhi e gjithë ajo “kazino”, askush nuk donte ta besonte. Unë isha i pari, që mbeta pa fjalë”.
“Gjërat shkruhen gjithmonë ashtu siç dëshiron dikush. Në atë moment që Juventusi u desh të luante në Serie B, e kishte të domosdoshme të hiqte qafe disa lojtarë me paga të rëndësishme. Ata më shitën mua dhe Emerson te Real Madridi, si dhe Thuram e Zambrotta te Barcelona”.
