Situata e vështirë e krijuar nga koronavirusit në Shqipëri përveç varfërisë së mijëra familjeve, ka nxjerrë në pah edhe një fenomen tjetër, abuzimin me çmimet nga kompani të ndryshme.
Këto kompania kanë nisur të përfitojnë nga situata aktuale, duke abuzuar me çmimet, të cilat nuk përkojnë me vlerën reale të produkteve që ato tregtojnë.
Pjesë e kësaj skeme abuzimi janë bërë kompani që shesin produkte elektro-shtëpiake, televizorë, celularë, laptopë etj.
Një prej këtyre është edhe ‘Aza Electronics’, e cila duket se po shfrytëzon interesimin në rritje për blerjen e produkteve të saj, duke abuzuar dukshëm me çmimet.
Ka qenë një qytetar, i cili është interesuar për të blerë një Iphone te kompania në fjalë, që ka denoncuar në redaksinë e JOQ Albania fenomenin e pazakontë, që po manifestohet në nivele të frikshme përgjatë këtyre ditëve.
Për shkak të pamundësisë për të dalë jashtë, qytetari ka zgjedhur të kontaktojë online me kompanitë për të porositur produktin për të cilin ishte i interesuar.
Kompania në fjalë e ka njoftuar atë se ka vetëm Iphone 7. Mirëpo, qytetari ka ‘shqyer sytë’ kur pa mesazhin në të cilin ‘Aza Electronics’ i shkroi se produkti në fjalë kushtonte plot 104.999 lekë.
Me të drejtë, qytetari e pyeti nëse bëhet fjalë për 105 mijë lekë, por siç shihet dhe në bisedat e dërguara, kompania i ka thënë se produkti kushton 1 milionë e 50 mijë lekë.
Mirëpo, mjafton një kërkim i thjeshtë në internet për të zbuluar se Iphone 7 nuk kushton më shumë se 600 euro, pasi është prodhim i vitit 2016.
Ky është vetëm një rast, të cilin një konsumator vendosi ta bëjë publik, por pyetja që shtrohet është se sa raste të tjera abuzimesh me çmimet ndodhin?
Dhe pyetja që shtrohet është pse nuk vepron Autoriteti i Konkurrencës, pasi raste të tilla po shtohen ndjeshëm nga dita në ditë? /JOQ/
