Cristiano Ronaldo mund të krenohet me shumë arritje përgjatë karrierës së jashtëzakonshme që ka pasur, megjithatë gjërat mund të ishin të ndryshme nëse ai nuk do të kishte kryqëzuar rrugët me Laszlo Boloni, trajnerin aktual të Royal Antwerp, i cili e shpalli Sportingun drejt titullit të ligës në sezonin 2001/02.
Një vit më pas, një Ronaldo i ri, me numrin 28 në shpinë, debutoi për herë të parë me Sportingun e Lisbonës nën urdhrat e Laszlo Bolonit. Ronaldo, atëherë 17 vjeç, bëri debutimin kur zëvendësoi Tonito-n në minutën e 58-të, gjatë një barazimi 0-0 me Interin, ndeshje ajo e vlefshme për kualifikueset e Ligës së Kampionëve, dhe pavarësisht se ndeshja ishte e një rëndësie të madhe, Ronaldo kurrë nuk u ndje në presion.
Gjithsesi, Boloni duke folur për “Marca” se si vendosi ta thërriste portugezin në skuadrën e parë pas vetëm dy ndeshjesh në skuadrën B të Sportingut, ai tha:
“Unë shkova për të parë ndeshjen e të rinjve të klubit dhe i kërkova që të vinte të stërvitej me ekipin e parë, sepse kishte një fizik të mirë. Cristiano ishte shumë i shpejtë, kishte teknikë të shkëlqyeshme. Kjo nuk ishte befasi për mua”
“Surpriza erdhi në seancën e tij të parë stërvitore me të rriturit. Kur e pashë në veprim, vendosa që ai të mos luante përsëri me të rinjtë. Ronaldo ishte një burrë i ri. Në dhomën e zhveshjes bënte shaka, por në fushë nuk falte, kthehej në një lojtar të jashtëzakonshëm. Ai kishte një pjekuri, që nuk është normale për dikë 16-17 vjeç”.
“Nuk e dija që ai do të ishte ai që është sot, por premtonte për një lojtar shumë të mire, pa lëndime. Në atë kohë më pyetën për Cristiano në një intervistë dhe unë thashë se do të tejkalojë Figon dhe madje Eusébio. Këto fjalë krijuan një problem për mua, sepse ata janë dy Zotë në Portugali. Unë guxova të krahasoja një djalosh të ri me dy Zota… Ronaldo, megjithatë, siç të gjithë e dinë tani ka treguar se kisha të drejtë”.
