Pronari i Lazio , Claudio Lotito, ka deklaruar ai do të pranonte një ndeshje direkte me Juventusin për të vendosur titullin në Serie A nëse sezoni nuk mund të rifillojë.
I pyetur nga “La Repubblica” nëse do të pranonte një përballje me Juventusin për të caktuar titullin kampion, Lotito është përgjigjur:
“Po, unë do ta pranoja. Le të jetë e treta e vërteta, pas dy fitoreve tona 3-1 në këtë sezon. Por nuk mendoj se kjo do të ndodhë. Besoj se kampionati do të rifillojë dhe meqë ra fjala, do të jemi të penalizuar. Ne kishim bërë një zgjedhje, duke besuar se nuk mund të garonim në tri fronte. Sakrifikuam “Europa League”, duke pasur parasysh se ishte kompeticioni më i pakëndshëm për ne. Kështu, do të kishim luajtur një herë në javë, ndërsa rivalët dy herë në 7 ditë. Nëse do të fillojmë përsëri, të gjithë do të luajmë dy herë në javë, do ta humbasim një avantazh. Por, tashmë flitet për interesin e 20 klubeve”.
Lazio e drejtuar nga Simone Inzaghi gjenden në vendin e dytë në Serie A, 1 pikë më pak se kryesuesit e Juventusit dhe 8 pikë më shumë se Interi i vendit të tretë.
