Nga Boldnews.al
Dy vrasje me 4 viktima kanë tronditur sot brenda pak orësh Durrësin dhe Lezhën. Krimet ndodhën në një kohë kur policia dhe ushtria ka zbarkuar në rrugë e sheshe në kuadrin e masave për ndalim qarkullimin, i vendosur për parandalimin e përhapjes së Covid-19.
Krimi i parë me dy viktima ndodhi në Lezhë, në një zonë të thellë malore, ku dy qytetarë sipas raportimeve u qëlluan me breshëri automatike.
Pak orë më pas në Durrës, dy persona të tjerë, vëllezër ose të afërm, u ekzekutuan brenda automjetit të tyre në atë që njihet si tregu i makinave në zonën e Nish Tullës në qytetin bregdetar.
Si në vrasjen e parë ashtu edhe në të dytën autorët u larguan në drejtim të paditur, policia shkoi në vendin e ngjarjes duke nisur hetimet, ndërsa 4 qytetarë do i mungojnë familjeve të tyre.
Mes lajmeve të shumta, u raportua se drejt Durrësit ka udhëtuar edhe Drejtori i Përgjithshëm i Policisë, Ardi Veliu.
Këtë rradhë me siguri nuk ka shkuar për të njoftuar masat se qytetarët nuk duhet të lahen në det, ashtu sikundër deklaroi nga një prej këtyre zonave të shpallura si të gjelbërta, dhe ku me urdhër të Kryeministrit masat kufizuese janë lehtësuar.
Veliu do të mbante një fjalim të gjatë duke folur për masat që duhej të respektoheshin nga qytetarët për të mos i “kapur” virusi ose armiku i padukshëm, dhe në këtë kuadër tha se nuk do të lejohej frekuentimi i plazheve.
E ndërsa nisi të flasë si një mjek, edhe pse këta të fundit po ngjiren duke thënë se koronavirusin e vret dielli apo uji i kripur i detit, Veliu harroi se është një kryepolic, që si mision kryesor nuk ka këshillat si të mbrohemi nga Covid-19, por të parandalojë krimin.
Sot u regjistruan 4 viktima në dy atentate brenda pak orësh. Kaq viktima nuk i shkaktoi Covid-19 në Shqipëri jo brenda pak orësh, por edhe me ditë. Të paktën referuar shifrave zyrtare të Ministrisë së Shëndetësisë, nuk ka pasur asnjë ditë që nga koronavirusi të kenë humbur jetën 4 qytetarë në pak orë, megjithëse numri i viktimave është 28.
Ndoshta, nga sot Kryepolici duhet të shqetësohet më shumë për rendin dhe sigurinë, sesa të bëjë rolin e mjekut dhe të merakoset nëse do të lahen në det apo jo shqiptarët.
