Nënkryetari i LSI-së, Petrit Vasili, tha se Shqipëria ndodhet në një karantinë politike dhe aspak të mbështetur në të dhënat shkencore.
Përmes një postimi në rrjetet sociale, Vasili tha se OBSH ka kërkuar testime, ndërkohë që Kryeministri Edi Rama zgjodhi modelin e Zvicrës për testimet mbi moshën 65 vjeç.
“Tashmë kjo skemë e përdorur nga Edi Rama ka dalë e dështuar”, shprehet Vasili.
Sipas tij, Rama këshilloi të kundërtën edhe për maskat mbrojtëse, pasi nuk i blinte dhe nuk i siguronte ato.
“Rama ka imponuar një karantinë politike, pasi nga ana shkencore nuk ka asnjë kuptim që mbyll shqiptarët në shtëpi nga e premtja pasdite deri mëngjesin e së hënës. Çfarë kuptimi ka mbyllja me orar e aktiviteteve tregtare, duke krijuar rradhë në dyqanet apo biznese të ndryshme”, shprehet Vasili.
Sipas tij, Rama flet edhe si ekspert, edhe si epidemiolog, edhe si virolog.
