Partia Drejtësi, Integrim dhe Unitet i ka drejtuar një apel Kryeministrit Edi Rama që të rrisë numrin e testeve në popullatë, si dhe të identifikojë të infektuarit me koronavirus në laboratorë shtetëror e privat.
“Cinizmi me shqiptarët ku udhëheqësit dhe familjet e tyre testohen në spitalet private duhet të marë fund. Sot duhet të lejohen të gjithë shqiptarët të bëjnë analizat aty ku ata dëshirojnë e të mos mbeten në humorin e rregjimit”, thuhet në reagimin e PDIU.
Duke e cilësuar me pasoja të rënda mbajtjen mbyllur të ekonomisë dhe njerëzve ndërkohë që nuk ka asnjë ide të situatës reale dhe të atyre që realisht janë të prekur apo e kanë kaluar virozën, PDIU thekson se denoncimi i gazetarit Erjon Skëndaj, tregon qartë se si po mashtron dhe manipulon qeveria me shifrat.
“Kjo nxjerr në pah gjithë eksperimentin social që po bëhet me shqiptarët. Burra e gra, pleq e fëmijë të mbyllur brenda, ndërsa ndërmarrjet me qindra punonjës në punë pa asnjë masë mbrojtëse.
Numra që kundërshtojnë veten e që mbahen me çdo mënyrë të kontrolluara, strategji pa asnjë qëllim tjetër përveçse të mbajnë të mbyllura për opinionin, shifrat reale të të prekurve dhe viktimave. Strategji që tentojnë vetëm ti marrin dinjitetin qytetarëve të vendit kur i nxjerr me fasha orare, gratë me fëmijë, të moshuarit, burrat më vete me dhe pa maska, të cilëve ka harruar dhe ti bërtasë si para disa javësh kur i tregonte si laheshin duart e si bëheshin male me të vdekur”, thuhet në deklaratën e PDIU.
