Nga Boldnews.al
Qeni pastor, bulldog, pekinez, kone, çiuava, por edhe e çdo rrace tjetër, të pastër apo kryqëzuar, të janë mirënjohës. Faleminderit kryeministër! Ata nuk dinë të flasin, as të shkruajnë në profilin tënd në facebook, por e ndjejnë që jetojnë në një vend ku kryeministri i “njerëzve”, mendon fort edhe për kafshët. Madje është aq i ndjeshëm sa menjëherë pasi “zgjidhi” problemet e mëdha të homosapiensëve shqiptarë, mendon edhe për qentë apo macet shtëpiake.
Datë 24 prill 2020, është mesditë… Ai mori një vendim të rëndësishëm. Të gjithë atyre që kanë kafshë shtëpiake, kryeministri Edi Rama iu premtoi që do të kenë mundësi së shpejti të aplikojnë për një leje te E-Albania. Rama tha se për të gjithë pronarët e kafshëve se do të ketë një leje të posaçme për ata që duan të dalin shtëtitje me kafshët shtëpiake.
“Është edhe kjo dicka që kam marrë shumë ankesa të drejta nga njerëzit që kanë qen, kanë një lidhje të tyre me kafshët. Për kafshët do ketë një platformë një autorizim specifik, brenda ditës së nesërme do jenë të gjitha të konsoliduara te E-Albania”, vendosi Rama.
Pra, që nesër një opsion i veçantë në portalin e madh “E-Albania” do ketë një sektor specifik për kafshët. Kërkesat do analizohen nga një grup i madh punonjësish të shtetit, një
“Task-Forcë” e posaçme ndërinstutucionale të shumë sektorëve qeveritar, që po punojnë të palodhur në këtë kohë të ligë pandemie dhe luftojnë me duke korrur fitore kundër një armiku të tmerrshëm të padukshëm…
Të zotët e kafshëve në pak minuta do sigurojnë virtualisht atë fashë orari daljeje bashkë me qenin, apo edhe ndonjë mace rrace. Do dalin lirshëm, pa pasur merakun se policia do i ndjekë nga pas për t’i gjobitur. Qentë do lehin, karvani i qeverisë të shkojë përpara…!
Faleminderit kryeministër, është pak vetëm një falenderim, por kaq janë mundësitë tona. Nuk mendon vetëm për ne njerëzit që të jemi mirënjohës që na fale jetë, që tu shtoftë jeta sa Mali Korabit, Tomorit e çdo thepi të Alpeve të Shqipërisë…
Do kishin vdekur nja 18 mijë e kusur njerëz, (sikurse e keni thënë vetë ju Zoti Rama), por me masat e ndërmarra nga kështjella në Kodrat e Surrelit, na shpëtove jetë! Ani se shifra 18 mijë të vdekur është e përafërt sa popullsia e Kinës, po s’ka gjë, ka plot shqiptarë Rilindas që e besojnë.
Vetëm se nuk lejohen grumbullimet, por qentë do kishin rendur përballë kryeministrisë me dhe pa maska ndër hundë që do e falenderonin, me një miksim lehjesh nga konet deri tek zëtrashët pitbullë. Megjithatë, kreu ynë i qeverisë e di mirë se liridalja për qentë, pasi të kenë aplikuar në portalin e “qeverisë virtual” (E-Albania), është një masë jetike.
Por ka edhe një fakt të dhimbshëm, që me siguri “kryeministër mëshirëmadhi” nuk është informuar. Qentë e rrugës, që nuk janë rracë e pastër, jënë zhdukur nga Bashkia Tiranë, duke i vrarë me helm të shpejtë që u ndalon zemrën. Por ky nuk ishte një vendim i Ramës, por i kryetarit të Bashkisë Erion Veliaj. As Enveri nuk e dinte se çfarë bënte Mehmeti me kokën e vet…! Me këtë vendim enkas për qentë, edhe Lali Eri do të mendohet dy herë para se të urdhërojë shkrehjen e pushkëve me shigjeta helmi mbi kafshët e pambrojtura.
