Komiteti Ekzekutiv i UEFA-s ka paralajmëruar 55 federatat e saj anëtare që ata duhet të përfundojnë sezonin aktual, ose do të përballen me përjashtimin nga Champions League dhe Europa League.
Në një komunikim dërguar të gjithë anëtarëve të saj, UEFA tha se rezervonte të drejtën të përjashtonte nga garat e saj kontinentale çdo federatë që përfundon sezonin para kohe. Sidoqoftë, UEFA ka paraqitur dy arsye specifike për të cilat federatat do të shfajësohen për mos plotësimin e ndeshjeve të sezonit 2019/20.
E para do të ishte në rastin kur jepet një urdhër zyrtar qeveritar e cila ndalon ngjarjet sportive dhe nuk jep lejen për përfundimin e sezonit dhe për diçka të tillë federatat e një vendi të caktuar nuk mund të bëjnë asgjë.
Rasti i dytë do të ishte nëse çështjet e pakapërcyeshme financiare do ta bënin të pamundur përfundimin e sezonit sepse kjo do të rrezikonte qëndrueshmërinë financiare afatgjatë të një Lige të caktuar dhe të klubeve. – raporton “AS“.
Nga 5 kampionatet më të forta në Europë, Bundesliga është ajo që pritet të rikthehet e para dhe aktualisht është në pritje të dritës jeshile nga qeveria gjermane.
