Dritat vijojnë të ndriçojnë atraksionet kryesore turistike të Parisit, si Champs Elysees apo kulla Eiffel, por është errësirë dhe qepenat janë të ulura në rrugët më popullore të qytetit të mbushura me bare e restorante, të cilat ishin gjithmonë të mbushura e të zhurmshme pas mesnate.
67 milionë banorë të Francës janë të izoluar që nga data 17 mars, e do të qëndrojnë kështu deri në 11 maj, për shkak të pandemisë koronavirus.
Qeveria franceze e përjashton mundësinë që restorantet, baret apo kafenetë të hapen menjëherë sapo të mbarojë periudha e izolimit, madje ministri i Financave, Bruno Le Maire deklaron se kufizimet ndoshta do të vazhdojnë në ato zona që janë më të goditurat nga Covid-19.
Franca renditet e katërta në nivel global për numrin më të lartë të vdekjeve si pasojë e koronavirusit me më tepër se 20 mijë viktima dhe më shumë se 158 mijë të infektuar.
Presidenti i vendit Emmanuel Macron dha urdhër për izolim në mes të marsit për të parandaluar përhapjen e virusit, ndërsa qeveria po punon për një plan i cili do të minimizonte mundësinë që vendi të goditet nga një valë e dytë koronavirusi.
