Organi qeverisës më i madh në botën e futbollit, FIFA, do të bëjë të mundur shpërndarjen e 150 milion eurove për 211 Federatat botërore të futbollit.
Lajmi është konfirmuar nga faqja zyrtare e FIFA-s në internet. Në lidhje me këtë iniciativë për të ndihmuar Federatat në këtë krizë financiare prej pandemisë, kreu i institucionit, Gianni Infantino, deklaron:
“Pandemia ka prodhuar një sfidë të paparë për gjithë komunitetin e futbollit dhe është detyrë e FIFA-s të mbështesë ata që kanë nevojë. Do të fillojmë duke ofruar ndihmë të menjëhershme për Federatat tona, shumë prej të cilave po përballen me vështirësi serioze”, deklaron kreu i FIFA-s.
Në ditët në vijim nis ndihma e parë e FIFA-s dhe FSHF (Federata Shqiptare e Futbollit) do të përfitojë 500 mijë euro, aq sa është shuma që do shkojë për çdo Federatë.
