Vetëm rreth 6 përqind e popullsisë franceze do të jenë infektuar me koronavirus kur bllokimet kombëtare të lehtësohen muajin tjetër, përfundon një raport shkencor vendas. Ai nënvizon shkallën e sfidës për vendet që po shqyrtojnë mënyrat se si të dalin nga regjimet e izolimit në një kohë që duhet të parandalojnë një valë të dytë infeksionesh.
Me më shumë se 20,000 vdekje të konfirmuara nga Covid-19 në spitale dhe shtëpitë e të moshuarve, Franca është një nga vendet më të prekura në botë.
Por raporti nga Institut Paster, organi kryesor i kërkimeve biomjekësore në Francë, nga Public Health France dhe nga Qendra Kombëtare e Kërkimit Shkencor thotë se kjo normë të parashikuar e infeksionit “është shumë nën nivelin e nevojshëm për të shmangur një valë të dytë nëse të gjitha masat e kontrollit hiqen”.
Disa shkencëtarë besojnë se, pa një vaksinë, transmetimi i virusit mund të ndalet vetëm përmes të ashtuquajturit imunitet i tufës. Raporti thotë se: “Niveli i imunitetit kolektiv që kërkohet aktualisht duhet të jetë 70 per qind. Prandaj, për të shmangur ringjalljen e epidemisë ndalimet dhe bllokimet do të duhet të mbahen edhe përtej 11 majit.”
Provat nga vendet e tjera, përfshirë ato në të cilat spitalet janë tejmbushur nga pacientët me Covid-19, tregojnë një model të ngjashëm të niveleve relativisht të ulëta të infeksionit të përgjithshëm.
OBSH tha që studimet e bazuara në testet e antitrupave për Covid-19 – të cilat kontrollojnë nëse dikush është prekur dhe shëruar nga virusi – treguan se norma e përgjithshme e infeksionit është rreth 3 përqind e popullatës. Vlerësimet nga vendet e tjera të goditura janë në nivele të njëjta me ato të Francës.
Studiuesit nga Kolegji Imperial i Londrës vlerësojnë se deri më 28 mars mund të jenë infektuar nga virusi 1-5.5 përqind e popullsisë në Mbretërinë e Bashkuar.
Ndërkohë një raport tjetër, i publikuar dy ditë më parë, që ka përdorur një model statistikor të agjensisë së shëndetit publik të Suedisë, ka nxjerrë që një e treta e njerëzve të Stokholmit do të jenë të infektuar nga virusi deri më 1 maj. Zyrtarët suedezë të shëndetit kanë thënë i njëjti model ka nxjerrë se për cdo rast të zbuluar ka 99 raste të tjerë të pakonfirmuar./FT
