Kreu i Urgjencës Kombëtare, Skënder Brataj ia doli të fitojë luftën me koronavirusin dhe ka disa këshilla për qytetarët në rast se shohin dikë duke u rrëzuar në rrugë.
Ndonëse këto ditë është kufizuar lëvizja dhe njerëzit dalin vetëm me autorizim, mund të ndodhin raste të ngjashme me Kinën.
Në një komunikim live në “Facebook”, Brataj i tregoi qytetarëve çfarë duhet të kenë parasysh duke nisur nga përdorimi i maskës deri tek kujdesi për të tjerët.
“Maska që ne përdorim, ato të thjeshtat, nuk të mbrojnë nga infektimi. Nëse unë jam bartës i sëmundjes, duhet të përdor maskën, për të mos infektuar të tjerët. Për t’u mbrojtur 100% nga të infektuarit, personeli shëndetëso përdorin maskat kirurgjikale.
Nëse jemi në lëvizje, nuk je i sëmurë, nuk ka sens përdorimi i maskës. Maska duhet përdorur, kur je i infektuar, kur do të shkosh në një vend ku do të rrish në radhë, mund ta përdorësh. Koronavirusi nuk shkakton arrest kardiak të menjëhershëm. Pra, nëse shihni dikë në rrugë duke u rrëzuar, duhet ta ndihmoni, të afroheni të paktën, ta pyesni, pasi të vini dorezat dhe maskën”, u shpreh kreu i Urgjencës.
Brataj theksoi sërish se sëmundja mund ti prekë të gjithë, pa rëndësi moshe apo gjinie.
