Në Formula 1 për sezonin e vitit 2021 priten disa ndryshime në rregullat e sportit. Një nga rregullat që prej kohësh është thënë se do të ndryshojë, është reduktimi i buxheteve të skuadrave pjesëmarrëse. Kjo gjë bëhet me qëllimin që hendeku financiar mes skuadrave të vogla dhe atyre të mëdha të shkurtohet ndjeshëm dhe në këtë mënyrë konkurrenca do të ishte më e fortë.
Ndërsa Mercedes është shprehur e gatshme për të bashkëpunuar, një gjë e tillë nuk ka ndodhur me dy skuderitë e tjera të mëdha si Ferrari dhe Red Bull. Madje skuderia italiane, ka dalë hapur duke kërcënuar se nëse një ligj i tillë do të aprovohej, ata do të tërhiqeshin nga bota e Formula 1.
Duke folur për “The Guardian”, shefi i “Kokëkuqes”, Mattia Binotto, ka thënë:
“Niveli prej 145 milion dollarësh në sezon ku po operojmë aktualisht, është më pak se ajo shumë që u përcaktua sezonin e kaluar, kështu një shkurtesë tjetër në buxhet nuk do të ishte e nevojshme”.
“Nëse buxheti do të binte edhe më shumë, do të na vinte në pozitën për të konsideruar opsionet për të nxjerrë makinat në pistë apo jo.”
“Në F1, ne kemi lloje të ndryshme të ekipeve me karakteristika të ndryshme. Ata operojnë në vende të caktuara, nën legjislacione të ndryshme dhe me mënyrat e tyre të punës. Prandaj nuk është e thjeshtë për të bërë ndryshime strukturore thjesht duke shkurtuar kostot në mënyrë lineare.”
