Një teori që po bën shumë bujë në median sociale, por edhe në tabloidët amerikanë dhe britanikë, thekson se ka një arsye tjetër se përse meshkujt preken më shumë se femrat nga koronavirusi. Kjo lidhet me faktin se virusi mund të qëndrojë më shumë te testikujt e meshkujve, shkruan Daily Mail.
Studimi është kryer nga Aditi Shastri, një onkologe në Qendrën Mjekësore Montefiore në SHBA dhe nëna e saj, Jyanthi Shastri, mikrobiologe në Spitalin Kasturba për Sëmundjet Infektive në Mumbai.
Sipas studimit të kryer me 68 pacientë të shëruar, virusi duket se bashkohet me një proteinë që gjendet në nivele të larta te testikujt e meshkujve.
Por meqë testikujt janë të shkëputur nga sistemi imunitar, virusi mund të strehohet atje për një periudhë më të gjatë sesa në pjesën tjetër të trupit.
Studiueset nënë e bijë thanë se kjo gjetje mund të shpjegojë se përse virusi kërcënon më shumë burrat. Ato zbuluan se pacientet femra pastrohen nga virusi për katër ditë, kurse meshkujt për gjashtë ditë. Thuajse në të gjitha vendet e botës, numri i meshkujve që ndërrojnë jetë nga infeksioni është më i lartë se i femrave.
Mjekët sugjerojnë se kjo vjen për shkak se meshkujt janë më vulnerabël pasi kanë më shumë gjasa që të tymosin duhan apo që të vuajnë nga sëmundjet e presionit të lartë të gjakut dhe zemrës.
