Albi Alla aktualisht aktivizohet me Shaanxi Chang’an Athletic, ekip ky që bën pjesë në Kategorinë e Dytë e futbollit kinez.
Alla që në Shqipëri ka luajtur me Kukësin dhe Bylisin, së fundmi ka dhënë një intervistë për “Supersport” në emisionin FanZone. Gjatë bisedës ai ka deklaruar se së shpejti do të udhëtojë drejt Kinës, për të nisur kampionatin me skuadrën e tij.
Mbrojtësi 27-vjeçar, gjithashtu ka thënë se ka pasur kontakte me Tiranën dhe se dëshiron të luajë për bardheblutë, ndërsa nuk e dëshiron një rikthim te Kukësi.
“Për momentin ndodhem në Greqi dhe jo në Kinë. Stërvitja në Kinë ka një muaj që ka nisur. Janë në një kompleks të izoluar dhe çdo gjë po shkon drejt normalitetit. Kam pasur bisedime me Tiranën mes menaxherit dhe kam dëshirë që të luaj për bardheblutë”.
“Në bisedimet e fundit që kam pasur, nuk mund të udhëtohet drejt Kinës. Për fat të mirë mua më ka dalë viza dhe shumë shpejt do shkoj atje. Ekipi i preferuar? Flamurtari dhe Tirana janë dy ekipet e mia të preferuara. Te Kukësi i arrita të gjitha ato që doja dhe nuk dua të kthehem më”.
