Pasi Europa u kthye në vatrën e Covid-19, të gjitha shtetet anuluan fluturimet, teksa Komisioni Europian vendosi të mbyll kufijtë duke mos lejuar lëvizjet brenda zonës Schengen.
Mirëpo, teksa në disa vende situata duket se po shkon drejt përmirësimit, shumë persona po pyesin nëse fluturimet do rikthehen.
Së fundmi, Reuters raporton se Komisioni Europian e parashikon një vendim të tillë, por sigurisht me masa strikte.
“KE do të paraqesë muajin e ardhshëm një sërë rregullash për rihapjen e sigurtë të udhëtimeve ajrore kur të mbarojnë bllokimet e pandemisë së koronavirusit, përfshirë distancimin shoqëror në aeroporte dhe në aeroplane.”, tha shefi i transportit të Bashkimit Europian, Adina Valean.
Sipas tij, disa rregulla të distancimit social në aeroporte dhe aeroplanë do të duhet të respektohen për të garantuar sigurinë e udhëtarëve, duke shtuar se masat, që janë ende në shqyrtim, do të përfshijnë edhe veshjen e maskave të fytyrës dhe dezinfektimin e aeroplanëve dhe aeroporteve.
Padyshim se ashtu si çdo biznes tjetër linjat ajrore kanë pësuar një goditje të fortë nga pandemia, teksa Shoqata Ndërkombëtare e Transportit Ajror (IATA) ka vlerësuar se kriza mund t’i kushtojë linjave ajrore në total 314 miliardë dollarë.
Mirëpo, lidhur me pyetjen se kur do mund të udhërojmë sërish nëpërmjet linjave ajrore, Valean thotë se ende nuk dihet se kur do të fillojë të operojë industria ajrore.
“Nuk mund të them tani kur kjo do të fillojë të ndodhë sepse ne duhet të dëgjojmë këshillat e specialistëve të shëndetit”.
