Disa herë miqtë më kërkojnë ti ndihmoj për problemet e tyre në këtë botë, duke përdorur “fuqitë magjike”. Unë gjithmonë u them atyre që Dalai Lama nuk ka fuqi magjike. Po të kisha, nuk do të ndieja dhimbje në këmbë ose dhimbje në fyt. Ne, si qenie njerëzore, jemi të gjithë njësoj, kemi përvoja të njëjta frikërash, të njëjtat shpresa, të njëjtat paqartësi.
Nga këndvështrimi budist, çdo qenie e gjallë vuan nga sëmundjet, pleqëria dhe vdekja. Por si qenie njerëzore, ne kemi aftësinë të përdorim mendjet tona për të mposhtur dhimbjen, zemërimin, panikun dhe lakminë.
Vitet e fundit kam theksuar “çarmatimin emocional”: të përpiqem t’i shoh gjërat realisht dhe qartë, pa ngatërrim frike ose tërbimi. Nëse një problem ka një zgjidhje, ne duhet të punojmë për ta gjetur atë; nëse nuk e bëjmë, nuk kemi nevojë të humbasim kohë thjeshtë duke menduar për të.
Ne Budistët besojmë se e gjithë bota është e ndërvarur. Kjo është arsyeja pse unë flas shpesh për përgjegjësinë universale. Përhapja e këtij koronavirusi të tmerrshëm ka treguar se ajo që ndodh me një person, së shpejti mund të prekë çdo qenie tjetër. Por gjithashtu na kujton se një veprim i dhembshur dhe konstruktiv – qoftë kur punon në spital ose thjesht kur je duke mbajtur distancim social – ka potencialin për të ndihmuar shumë.
Që kur u shfaqën lajmet për koronavirusin në Ëuhan, unë jam lutur vazhdimisht për vëllezërit dhe motrat e mia në Kinë dhe kudo tjetër. Tani mund të shohim që askush nuk është imun ndaj këtij virusi. Të gjithë jemi të shqetësuar për të dashurit tanë dhe të ardhmen tonë, si për ekonominë globale ashtu edhe për shtëpitë tona individuale. Por lutja nuk është e mjaftueshme.
Kjo krizë tregon se të gjithë duhet të marrim përgjegjësi aty ku mundemi. Ne duhet të kombinojmë kurajon që mjekët dhe infermierët po tregojnë nëpër spitale, për të filluar ta kthejmë këtë situatë në favorin tonë dhe të mbrojnë të ardhmen tonë nga kërcënime të tilla.
Në këto kohë të një frike të madhe, është e rëndësishme që të mendojmë për sfidat afatgjata – dhe mundësitë – e të gjithë globit. Fotografitë e marra nga hapësira tregojnë qartë se në planetin tonë blu nuk ka kufij të vërtetë. Prandaj, të gjithë ne duhet të kujdesemi për të dhe të punojmë për të parandaluar ndryshimin e klimës dhe forcat e tjera shkatërruese. Kjo pandemi shërben si një paralajmërim se vetëm duke u bashkuar me një përgjigje të koordinuar globale, ne do të përballojmë madhësinë e paparë të sfidave me të cilat po përballemi.
Ne gjithashtu duhet të kuptojmë se askush nuk është i imunizuar nga vuajtjet, dhe të shtrijmë duart tona për ata që nuk kanë shtëpi, burime ose familje për t’i mbrojtur. Kjo krizë na tregon se ne nuk jemi të ndarë nga njëri-tjetri – edhe kur jetojmë larg. Prandaj, të gjithë ne kemi një përgjegjësi të ushtrojmë dhembshurinë dhe të ndihmojmë.
Si një Budist, Unë besoj në parimin e përjetësisë. Përfundimisht, ky virus do të kalojë, pasi kam parë luftëra dhe kërcënime të tjera të tmerrshme të kalojnë në jetën time. Ne do të kemi mundësinë për të rindërtuar komunitetin tonë global, siç kemi bërë shumë herë më parë.
Sinqerisht shpresoj që të gjithë mund të jetojmë të sigurt dhe të qetë. Në këtë kohë të pasigurisë, është e rëndësishme që të mos humbim shpresën dhe besimin në përpjekjet konstruktive dhe të kuptojmë gjithashtu se duhet të bëjmë më shumë. /TIME
Dalai Lama është lideri shpirtëror i Budistëve të Tibetit dhe fitues i Çmimit Nobel.
