Tre shqiptarë u arrestuan nga policia italiane me akuzën e vjedhjes së banesave. Hetimet ndaj tyre zgjatën dy muaj, ndëtrsa grabitja e parë kishte ndodhur në Osimo më 9 dhjetor të vitit të kaluar në një shtëpi, ku vodhën një bizhuteri.
Karabinierët zbatuan urdhër-arrestet e lëshuara, duke i akuzuar ata për gjashtë vjedhje të banesave, si dhe dy vjedhje të mbetura në tentativë.
Vjedhjet ishin kryer në Marche, një në provincën e Ankonës, tre në provincën e Macerata dhe dy në provincën e Pesaro.
Të gjitha grabitjet kishin karakteristika të përbashkëta, përfshirë periudhën kohore (ndërmjet 17 dhe 20), distancën e shkurtër mes banesave, hyrjen në shtëpi nga prapa, duke u ngjitur në katet më të larta nëpërmjet kangjellave dhe ulluqeve.
Gjatë kontrolleve, si të automjeteve të përdorura prej tyre ashtu edhe të shtëpive, policia gjeti sendet e vjedhura si dhe mjetet e përshtatshme për të kryer grabitjet.
Të njëjtët të dyshuar janë raportuar për 43 vjedhje të tjera të kryera në provincat Pesaro-Urbino, Rimini, Ravenna dhe Forlì, për të cilat prokurorët po hetojnë.
