Akti Normativ i Qeverisë, përmes të cilit, Kryeministri Edi Rama tha se falen gjobat dhe i kthehen patentat e marra për 3 vjet drejtuesve të automjeteve, sikundër makinat e bllokuara, për shkak të thyerjes së rregullave të karantinës, është botuar në Fletoren Zyrtare.
Kryeministri Rama do të deklaronte se këto shkelje faleshin pasi “jemi një familje e madhe në një situatë të jashtëzakonshme, ku edhe ata që u nxituan meritojnë sot teksa lufta vazhdon, një shans të dytë në vend të një halli më shumë!”
Deklarata e Ramës u bë pasi Kuvendi miratoi ndryshimet në Kodin Penal, që parashikojnë dënime me gjoba dhe burg ndaj personave që thyejnë karantinën.
Por qëndrimi i Ramës prodhoi debate, veçanërisht nga ekspertë të fushës ligjore, sipas të cilëve Kryeministriu detyrua të tërhiqet, pasi në momentin e aplikimit të masave administrative, Aktet Normative nuk ishin botuar në Fletoren Zyrtare, çka do të thotë se nuk kishin asnjë vlerë ligjore dhe do rrëzoheshin nga gjykatat Administrative.
Po çfarë parashikon Akti Normativ për faljen e masave administrative me karakter ndëshkues të vendosura gjatë periudhës së epidemisë së shkaktuar nga Covid-19?
Në Aktin Normativ parashikohet kthimi i shumës së detyrimit të falur, por të paguar, përmasat administrative me gjobë, merret nga zëri përkatës i buxhetit të shtetit apo buxhetit të institucionit në të cilin është arkëtuar shuma, me urdhër të nëpunësit të parë autorizues, dhe kalohet në mënyrë automatike në llogarinë bankare të individit ose në mungesë të saj, kjo shumë i dërgohet institucionit shtetëror që ka vendosur masën me gjobë për t’ia dorëzuar subjektit përfitues.
Akti Normativ
Në mbështetje të nenit 101 të Kushtetutës, me propozimin e ministrit të Shtetit për Rindërtimin dhe të ministrit të Shëndetësisë dhe Mbrojtjes Sociale, Këshilli i Ministrave
VENDOSI:
Neni 1
Falja e masave administrative
Falen të gjitha masat administrative me karakter ndëshkues, të vendosura nga autoritetet shtetërore përkatëse, për shkeljen e rregullave apo të akteve ligjore e nënligjore të nxjerra në kuadër të masave të ndërmarra për parandalimin dhe luftimin e infeksionit të shkaktuar nga COVID-19, duke filluar nga momenti i konstatimit të kësaj sëmundjeje në territorin e Republikës së Shqipërisë deri në datën 17.4.2020.
Neni2
Kthimi i detyrimit të masës administrative me gjobë
1. kthimi i shumës së detyrimit të falur, por të paguar, përmasat administrative me gjobë, merret nga zëri përkatës i buxhetit të shtetit apo buxhetit të institucionit në të cilin është arkëtuar shuma, me urdhër të nëpunësit të parë autorizues, dhe kalohet në mënyrë automatike në llogarinë bankare të individit ose në mungesë të saj, kjo shumë i dërgohet institucionit shtetëror që ka vendosur masën me gjobë për t’ia dorëzuar subjektit përfitues.
2. Të gjitha institucionet shtetërore duhet të dërgojnë listat e personave ndaj të cilëve është vendosur masa administrative me gjobë, duke përfshirë shumën si dhe të dhënat e nevojshme për kthimin e saj brenda datës 30 prill 2020.
3. Kthimi i shumave pranë llogarisë bankare të subjektit përfitues apo institucionit shtetëror që ka vendosur masën administrative me gjobë të bëhet brenda datës 15 maj 2020.4.
Mënyra dhe rregullat e hollësishme të kthimit të shumave të paguara përcaktohen me udhëzim të ministrit të Financave dhe Ekonomisë.
Neni 3
Kthimi i lejeve/licencave dhe i mjeteve të bllokuara,në zbatim të masave administrative
1. Të gjitha masat administrative me karakter ndëshkues, përjashtuar ato të parashikuara në nenin 2,të këtij akti normativ,si lejet/licencat dhe mjetet e bllokuara,duhet të kthehen brenda datës 15 maj 2020 te subjekti përfitues.
2. Ngarkohen titullarët e secilit prej institucioneve shtetërore, që kanë vendosur masa administrative sipas këtij neni, të nxjerrin udhëzimet përkatëse për përcaktimin e mënyrës së kthimit të detyrimit të falur.
