Nga Boldnews.al
Zyrtarë të rëndësishëm ndërkombëtarë në Tiranë kanë ngritur shqetësimin për atë që e konsiderojnë “mefshtësi”, por pa shmangur edhe dyshimet për “ndikim politik” në veprimtarinë e deritanishme të Prokurorisë Speciale-SPAK.
Burime diplomatike deklaruan për “Boldnews.al” se transferimi apo bllokimi i hetimeve ndaj zyrtarëve të lartë qeveritarë për dyshime mbi manipulim zgjedhor, kanë lënë shije të hidhur tek partnerët ndërkombëtarë.
Këta të fundit kanë investuar në krijimin e SPAK-ut, me synimin që Shqipëria të ketë një institucion, të aftë për të goditur korrupsionin dhe lidhjet e krimit të organizuar me qarqet e e rëndësishme politike.
Përtej pritshmërive të larta të opinionit publik dhe faktorit ndërkombëtar, SPAK-u nuk arriti të hetojë zyrtarë qeveritarë të nivelit të lartë, duke hequr dorë nga hetimet e trashëguara prej ish-Prokurorisë për Krime të Rënda, të cilat qëndruan të bllokuara gjatë drejtimit të Donika Prelës.
SPAK-u, një ndër strukturat që përbëjnë themelin e Reformës në Drejtësi, hoqi dorë nga dosja “184”, duke e transferuar në prokurorinë periferike të Dibrës.
Në këtë dosje, prokurorët e Krimeve të Rënda kishin siguruar përgjime të zyrtarëve të lartë, të cilët u diktonin strukturave lokale dhe personave të lidhur me krimin e organizuar që të manipulonin rezultatin e zgjedhjeve të pjesshme lokale në Dibër, në vitin 2016, në favor të Partisë Socialiste.
Pas disa ece-jakeve ndërmjet Tiranës dhe Dibrës, në Janar 2020, SPAK-u i sapokrijuar, vendosi që dosja “184” të hetohej përfundimisht në Dibër.
Kjo lëvizje shkaktoi rrudhjen e parë të buzëve të faktorit ndërkombëtar në Tiranë. Prej muajsh, kancelaritë perëndimore janë vënë në dijeni për “manovrat” e kryera në hetimet e dosjeve të nxehta nga ish-drejtueset e prokurorisë, Arta Marku dhe Donika Prela.
Qasja aspak pozitive ndaj këtyre dosjeve duket se vulosi fatin e dyshen Marku-Prela.
Faktori ndërkombëtar nxiti veprimet e Këshillit të Lartë të Prokurorisë për krijimin e SPAK-ut, me qëllim që dosjet me eksponentë politikë të hetoheshin plotësisht dhe përgjegjësit, në çdo nivel qeverisjeje, të vendoseshin para drejtësisë.
Kjo pritshmëri u thye shpejt. SPAK-u e përcolli dosjen “184” drejt Dibrës, duke vulosur përfundimisht përjashtimin nga hetimi të politikanëve të lartë, të përgjuar qartësisht në biseda për manipulim votash.
Shpresa e faktorit ndërkombëtar tek SPAK-u po zbehet, pasi po konstatojnë se edhe një dosje tjetër e nxehtë, ajo me numër “339” ka hyrë në kalenda greke.
Një hetim shumë i gjerë i zhvilluar nga ish-Prokuroria për Krime të Rënda, ku përfshiheshin disa grupe kriminale, si edhe zyrtarë që janë përgjuar në biseda për manipulimin e zgjedhjeve të përgjithshme në vitin 2017, është copëzuar keqas.
Ndërkohë që një pjesë e konsiderueshme e të arrestuarve në Tetor 2018 tashmë po hetohen në gjendje të lirë, SPAK-u, i cili trashëgoi dosjen nga ish-Krimet e Rënda, është treguar gjithashtu pasive për hetimin e politikanëve të regjistruar në përgjimet e këtij hetimi.
Nën argumentin e veprimeve hetimore, SPAK-u, të paktën deri më tani, nuk ka njoftuar asnjë mbyllje hetimesh për zyrtarët e dosjes “339”, ndërkohë që nuk dihet nëse ata vijojnë të jenë subjekt hetimi apo jo.
SPAK-u, megjithëse vetëm disa muaj jetë, duket se është larg pritshmërive të faktorit ndërkombëtar, i cili së fundmi është vënë në lëvizje për të nxitur hetime me peshë, jo vetëm ato që lidhen me “339” dhe “184”.
Në zyrat e SPAK-ut ka edhe dosje të tjera, për të cilat partnerët ndërkombëtarë shpresojnë që prokurorët të nisin hetimet dhe të konkludojnë me ngritjen e akuzave në gjykatë.
“Boldnews.al”, i informuar nga burime diplomatike për këtë “ngërç” mes tyre dhe SPAK-ut, do të publikojë në vijim disa prej dosjeve në duart e prokurorëve specialë, të cilat kanë shqetësuar faktorin ndërkombëtar në Tiranë.
