Turi i Francës nuk do të fillojë siç ishte planifikuar, për shkak se Presidenti francez, Emmanuel Macron, ka anuluar të gjitha ngjarjet publike në përgjigje të pandemisë së Covid-19.
Macron, deklaroi mbrëmjen e djeshme se nuk do të kishte mbledhje të mëdha publike në vend deri në mes të korrikut, në përpjekje për të ndaluar përhapjen e koronavirusit.
Duke parë situatën e coronavirusit, organizatorët e Turit, thonë që tashmë është e pamundur që evenimenti që zgjat 3 javë të fillojë më 27 qershor, në Rivierën e qytetit të Nices.
Aktualisht mbetet e paqartë, nëse ngjarja më e madhe e çiklizmit do të hiqet fare nga kalendari për këtë verë. Më shumë detaje priten në fundin e muajit, pas konsultimeve të nevojshme me organet qeveritare të çiklizmit.
