Real Madrid po përgatit një revolucion të vërtetë në skuadër. Fillimisht klubi me në krye Florentino Perez, do të tentojë largimin e disa futbollistëve që nuk kanë të ardhme me klubin “Mbretëror”.
Tre lojtarët që duket se e kanë të sigurt largimin janë, Gareth Bale, James Rodriguez dhe Luka Joviç. Jashtë planeve të Zidane është edhe Mariano Diaz, ndërsa në pikëpyetje është e ardhmja afatgjatë e sulmuesit kryesor, Karim Benzema.
Duke parë këto largime të mundshme, trajneri Zidane, i ka kërkuar përforcime presidentit Perez në repartin e avancuar dhe numri 1 i Realit do të tentojë dy goditje të mëdha. Objektivat janë të qartë Erling Haaland dhe Kylian Mbappe. Sipas Marca, Haaland do të tentohet këtë verë ku Reali pritet të paguajë klauzolën e largimit prej 75 milionë eurosh, një shifër kjo qesharake duke parë edhe potencialin e frikshëm të norvegjezit.
Ndryshe është situata për Mbappen. Për francezin negociatat priten të fillojnë zyrtarisht pas një viti, ku problem mbetet kartoni tepër i shtrenjtë i lojtarit. PSG pagoi plot 180 milionë euro për ta marrë 21-vjeçarin nga Monaco dhe vështirë që PSG-ja do të kënaqet me këtë shifër. Gjithsesi duke parë krizën financiare prej koronavirusit por edhe kontratën që i skadon në verën e vitit 2022 të cilën 21-vjeçari nuk po e rinovon me PSG, Al-Khelaifi mund të detyrohet ta shesë për një shifër më të ulët duke parë edhe dëshirën e Mbappe për t’u transferuar te Reali i Madridit.
Me Mbappen aktualisht 21 vjeç dhe Haaland 19 vjeç, nënshkrimi me këto talente do të ishte një “kërcënim” indirekt për të gjithë rivalët, dhe do të hidhnin bazat për një të ardhme të ndritur.
