Shkencëtarët e universitetit Cinghua të Pekinin hedhin një hap të rëndësishëm drejt zbulimit të ilaçit kundër koronavirusit.
Ata kanë arritur të zbulojnë strukturën molekulare përgjegjëse për shumëfishimin e COVID-19 në organizëm.
Bëhet fjalë për enzimën polimerazë “nsp12”, kjo që shihni në këto foto, e cila konsiderohet si motori shumëfishues i këtij virusi.
Pikërisht këtë enzimë ka në shënjestër ilaçi Remdesivir, që u prodhua si një armë kundër virusit Ebola.
Kjo shpjegon edhe faktin pse Remdesivir është ndër ilaçet që ka dhënë rezultatet më të mira deri më tani në spitalet, ku janë kuruar të infektuarit me koronavirus.
Remdesivir është përdorur gjerësisht sidomos në Kinë ku nga 81 mijë të prekur në total që prej nisjes së përhapjes Dhjetorin e kaluar, aktualisht kanë mbetur vetëm 1 mijë të infektuar aktivë.
Megjithatë ende nuk është vërtetuar shkencërisht se Remdesivir është ilaçi i duhur kundër COVID-19.
Rezultatet e studimit të universitetit Cinghua të Pekinit u publikuan nga revista Science.
Zbulimi i kësaj enzime mund të çojë në prodhimin e ilaçit të duhur kundër COVID-19 dhe që mund ta shpëtojë globin nga pandemia dhe masat e ashpra bllokuese që po e çojnë ekonominë globale drejt recesionit të thellë.
