Kryebashkiaku Erjon Veliaj prej disa ditësh shfaqet duke shpërndarë ndihma te familjet në nevojë në kohën kur vendi ndodhet në një situatë pandemie me rregulla të forta në qarkullimin e qytetarëve, brenda një fashe orari që shtrihet nga oran 05:00-13:00.
Një ditë më parë, Veliaj duke dhënë një intervistë për Abcneës, tha se kishte dalë për të bërë pazare brenda rregullave, ndërsa pohoi se kishte blerë edhe dy koli me ujë.
“Bleva edhe dy koli me ujë”, tha Veliaj.
Por nëse kthehemi pak në kohë, ishte kryebashkiaku i Tiranës, që i drejtonte apel qytetarëve që të konsumonin ujin e çezmave, pasi ujësjellësi kishte bërë investime dhe ai ishte brenda të gjithë parametrave.
Madje Veliaj në apelin e tij i drejtohej qytetarëve që mos kujtonin se uji i burimeve, pra ai që tregtohet për konsum ishte më i mirë se ai që ofrohej nga rrjeti i UKT.
Dhe u desh kjo situatë pandemie që kryebashkiaku, ndoshta edhe pa vetëdije, pranoi publikisht se vetë ai konsumon ujë të blerë, pra atë ujin e burimeve, dhe nuk konsumon ujin që ofrohet nga UKT.
Atëherë pyetja që lind është pse mashtron Erion Veliaj?
Kur deklaronte se uji i rrjetit të UKT konsumohet, kryebashkiaku fliste me shumë entuziazëm, madje me këtë argument pra që qytetarët e Tiranës do mund të pinë ujë nga çezmat, ai rriti edhe çmimin e ujit dhe sot faturat e Ujësjellësit janë rritur gati dy herë në krahasim me atë çfarë paguanin abonetët e UKT.
Ndoshta kjo epidemi, pavarësisht qindra problemeve që krijoi, veçanërisht në Shqipëri, jo shumë në aspektin shëndetësor, por në atë social dhe ekonomik, zbulon edhe mashtruesin dhe mashtrimet.
Dhe në rastin konkret zbulohet mashtrimi i Veliajt ndaj qytetarëve, por edhe mashtruesi që drejton sot Tiranën si kryebashkiak.
