Reagimi i çuditshëm i Ministrisë së Shëndetësisë: I moshuari në Shkodër ishte me COVID, por nuk vdiq për shkak të COVID!

Ministria e Shëndetësisë ka reaguar lidhur me lajmin e publikuar në media se një person i cili ishte testuar pozitiv me koronavirusin e ri, ka humbur jetën. Në një njoftim të çuditshëm, MSH bën me dije se i moshuari 85-vjeçar me inicialet E.L. i cili ka ndërruar jetë në banesën e tij në Shkodër, nuk ka humbur jetën si pasojë e COVID-19, edhe pse ishte i infektuar.

“I moshuari, i cili prej dy muajsh qëndronte i palëvizur për shkak të një frakture koksofemorale dhe vuante nga diabeti mellitus, sëmundje kardiake dhe hipertension, ka ndërruar jetë si pasojë e infarktit të miokardit ditën e sotme. 85-vjeçari ka qenë bartës i COVID-19, i konfirmuar gjatë hetimit epidemiologjik të kryer tek të gjithë anëtarët e familjes së tij në Shkodër, por ka qenë asimptomatik gjatë gjithë kohës, pra pa shenja të sëmundjes. 85-vjeçari ndiqej nga mjeku i familjes, i cili ka konfirmuar se shkaku i vdekjes është infarkti i miokardit. Ministria e Shëndetësisë dhe Mbrojtjes Sociale i shpreh ngushëllime familjes së të ndjerit dhe siguron opinionin publik se do të informojë për situatën, sikundër ka bërë deri tani. Sqarojmë edhe një herë se 85-vjeçari, nuk është viktimë e COVID19 në Shqipëri”, thuhet në një njoftim. Ky është sqarimi që sipas ministrisë, rasti nuk llogaritet në statistikat zyrtare.

LEXO EDHE  Vetëvendosje, peticion për zgjedhje të reja

Njoftimi në fakt mund të cilësohet i çuditshëm nisur nga komunikimet e mëparshme të Ministrisë së Shëndetësisë për çështje të ngjashme. Thuajse gjithnjë në kësi komunikimesh, MSH ka informuar për pacientë “të konfirmuar me COVID-19” të cilët humbin jetën dhe jo “pacientë që humbin jetën nga COVID-19”.

Njoftimi i djeshëm i MSH, ku informon për një të moshuar “me COVID” që ka humbur jetën (jo që ka humbur jetë për shkak të COVID-19),e  megjithatë e klasifikon si viktima e 23 me COVID-19 në Shqipëri.

Komunikime të tilla evazive nga ana e ministrisë, duke përdorur kritere jo të qarta, ose të paktën të pasqaruara për llogaritjen e numrit të personave pozitivë me COVID-19 që kanë humbur jetën, ngrenë dyshime se akuzat e bëra nga opozita, e veçanërisht ish-kryeministri Sali Berisha se shifrat reale të personave të infektuar me koronavirusin e ri po fshihen, janë më shumë se sulme politike…

/BoldNews.al/