Kreu i opozitës Lulzim Basha i ka bërë apel qeverisë që të rrisë buxhetin për familjet në nevojë dhe të shpërndajë menjëherë ndihmën ekonomike.
Me anë të një postimi në Facebook, Basha thekson se ndihma ndaj qytetarëve shqiptarë është detyrë kushtetuese e qeverisë.
Ndërkohë Basha ka postuar edhe një video ku shihen qytetarët që bëjnë apel për ndihmë pasi nuk e përballojnë dot më këtë gjendje.
Postimi i Bashës:
Me mijëra njerëz në të gjithë vendin tregojnë mungesën e ndihmës dhe braktisjen nga shteti. Të përjashtuar nga plani i qeverisë, çdo ditë që kalon, për ta është një ditë pa bukë.
Duhet një plan i mirëmenduar mbështetjeje për të gjithë familjet shqiptare sipas nevojës dhe kushteve të secilit. Pagesa e mbijetesës për këdo që ka humbur punën nuk mund të vonohet më asnjë ditë!
Qeveria e ka për detyrë kushtetuese dhe ligjore të garantojë shëndetin dhe jetesën e çdo shqiptari. I bëj edhe një herë thirrje të shpërndajë pa asnjë vonesë fondet e ndihmës ekonomike dhe të rrisë buxhetin për emergjencën! Koha është TANI!👇
