Enkelejd Alibeaj, ish-deputet i PD, ka denoncuar sot një tjetër tender, pas 4 të zhvilluar nga Ministria e Shëndetësisë, pa asnjë transparencë.
Bëhet fjalë për tenderin e Ministrisë së Drejtësisë për paisje anti-COVID.
“Pas Ministrisë së Shëndetësisë edhe Ministria e Drejtësisë ka bërë tender për materiale mjekësore anticovid. Me urgjencë, me shpejtësi dhe sigurisht, sekret!
Fituesi, gjithnjë i paracaktuar! Kompania “FEDOS” shpk është “fituesja” dhe përfituesja e parave të shqiptarëve, që nuk dihet si janë harxhuar”, tha Alibeaj.
Sipas tij, tenderat e klasifikuar sekret i kanë mbyllur gojën qeverisë, e cila nuk jep asnjë shpjegim se ku shkuan 1.5 milionë euro të ushqimit të shqiptarëve, asnjë shpjegim pse u bënë sekrete 4 tendera të Ministrisë së Shëndetësisë, edhe pse ligji detyron qeverinë të bëjë transparencë.
“Sa para nga të shqiptarëve ka harxhuar në mënyrë sekrete? A ka abuzuar me këto para? A ka favorizuar ndonjë klient?
Kontrolli i Lartë i Shtetit dhe SPAK-u duhet të ulërijnë për zbatimin e ligjit. Shqiptarët i paguajnë për të gjetur padrejtësitë, abuzimet, vjedhjet dhe për t’i ndëshkuar ato”, tha Alibeaj.
