Në 24 orët e fundit policia ka ndëshkuar 41 drejtues mjetesh, 270 këmbësorë apo çiklistë dhe 5 njësi tregëtie në zbatim të masave kufizuese për vënien në kontroll të pasojave që sjellin përhapjen e COVID-19.
Ndërkohë dy shtetas në Pogradec nuk kanë zbatuar vetëkarantinën dhe janë gjobitur me 700.000 lekë. Shtetasja D. K., 32 vjeçe dhe I. M., 26 vjeç, të cilët ishin kthyer nga një qytet i Maqedonisë së Veriut dhe duhet të ishin vetëkarantinuar, por janë konstatuar nga shërbimet e policisë jashtë banesës.
Burime zyrtare bëjnë me dije se 41 drejtues mjetesh janë ndëshkuar me heqje të lejes së drejtimit dhe bllokim mjeti, që kanë shkelur urdhrin e ndalim qarkullimit. Ndërsa 270 shtetas janë konstatuar nga policia duke lëvizur në këmbë apo me biçikleta, pa ndonjë arsye apo emergjencë dhe janë gjobitur me 10.000 lekë gjobë.
Në të gjithë vendin janë konstatuar 5 njësi tregtie që nuk kanë zbatuar orarin e mbylljes dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Në Sukth, gjatë kontrolleve nga shërbimet e Policisë Durrës është konstatuar i hapur për herë të dytë, lokali “Bar kafe” në administrim të shtetasit A. J., të cilit iu bllokua aktiviteti për 6 muaj.
Policia e Shtetit apelon për të gjithë qytetarët që të respektojnë masat kufizuese, për të bërë të mundur parandalimin e përhapjes së COVID-19.
