“Ata që janë rezident në vendet e tjera nuk janë të lejuar për të ardhur në Shqipëri gjatë këtyre ditëve.”
Kështu shprehet ministri i Brendshëm Sandër Lleshaj për mediat nga Shkodra.
Në vend që të gjejë një zgjidhje për shqiptarët që prej të premtes ndodhen në mëshirë të fatit të bllokuar në dogana, Lleshaj zgjedh thirrjen e paprecedentë duke i kërkuar që të mos kthehen në Shqipëri.
“Ka shumë shqiptarë që jetojnë jashtë vendit. Por në kushtet e masave të jashtëzakonshme sot ne ju bëjmë thirrjen e kundërt, në qoftë se ne normalisht i thërrasim të gjithë shqiptarët të vijnë në Shqipëri të vizitojnë, sot i ftojmë të mos vijnë në Shqipëri të mos ta vizitojnë sepse i bëjnë dëm vetes dhe familjeve të tyre.” -tha Lleshaj.
Moslejimi i shqiptarëve të futen në atdheun e tyre është një skandal, madje qeveria nuk do t’ia dijë fare nëse ata rrijnë prej ditësh në të ftohtë dhe e kalojnë natën jashtë në acar.
