Polia kufitare në Kapshticë ka lejuar që 17 emigrantë shqiptarë, që kishin mbetur në tokën neutrale, të hyjnë në territorin shqiptar.
Midis personave që janë lejuar të kalojnë ka pasur nga ata me probleme shëndetësore, por edhe ato që kanë mundur të sigurojnë autorizimin nga autoritetet shqiptare.
Nuk dihet se mbi çfarë kriteresh është bërë përzgjedhja e miratimit të lejeve nga një pjesë e emigrantëve nga autoritetet shqiptare dhe pse nuk janë lejuar të gjithë të hyjnë në territorin shqiptar.
Prej tre ditësh mbi 50 shqiptarë, që ishin lejuar të udhëtonin drejt Shqipërisë nga autoritetet greke, kishin mbetur të bllokuar në atë që njihet si zona e gjelbër në kufirin mes dy vendeve, pasi autoritetet shqiptare nuk i lejonin të ktheheshin në atdhe.
Kjo me argumentin se kufiri ishte mbyllur në kuadrin e masave për parandalimin e përhapjes së koronavisurit.
Pritet që 17 shqiptarët që u lejuan të futen në territorin shqiptar t´i nënshtrohen kontrolleve mjekësore dhe do të karantinohen.
Emigrantët që kanë pasur probleme shëndetësore janë transportuar drejt spitalit rajonal të Korçës, por edhe në atë të Bilishtit.
Mësohet se ato janë transportuar drejt spitaleve me autoambulanca.
Në pikën e kalimit kufitar të Kapshticës ishin bllokuar rreth 50 shtetas shqiptarë, ndërsa 10 prej tyre pas dy ditë pritjeje ishin kthyer në Greqi.
Autoritetet kufitare janë shprehur se ishin në pritje të udhëzimeve nga Ministria e Jashtme lidhur me lejimin ose jo të shtetasve shqiptarë të kalonin kufirin.
Ndërkohë raportohet se autoritetet shqiptare i kanë kërkuar atyre greke që të mos lejojnë kalimin e shqiptarëve drejt kufirit shqiptar, i cili prej më shumë se dy javësh është i mbyllur.
