Kreu i opozitës Lulzim Basha ka reaguar pas skandalit që po ndodh në kufirin shqiptar, ku prej disa ditësh dhjetëra emigrant shqiptarë nuk po lejohen të futen në territorin tonë.
Në reagimin e tij Basha i ka bërë apel qeverisë që të lejojë shqiptarët të futen në territorin tonë.
Ja postimi i Bashës:
Situata me shqiptarët e bllokuar në kufirin me Greqinë, reagon kryetari Basha
Është e pafalshme dhe çnjerëzore që prej 4 ditësh dhjetëra nga bashkëqytetarët tanë janë lënë në mëshirë të fatit, në tokë asnjëanëse mes Shqipërisë dhe Greqisë.
Një braktisje e tillë mizore përbën një krim kaq të rëndë, sa asnjë shoqëri e civilizuar nuk mund ta falë, dhe që një prokurori me një fije integritet nuk mund të mos e hetojë.
I bëj thirrje qeverisë të lejojë këta bashkëqytetarë të hyjnë në atdheun e tyre. Të merren masa për transportin dhe strehimin e tyre në qendrën për karantinim në konvaleshencën e Durrësit. Të bëhet testimi i tyre dhe më pas në varësi të gjendjes shëndetësore të dërgohen pranë shtëpive dhe familjeve të tyre.
Braktisja e tyre në këtë kohë të vështirë është e papranueshme, është kriminale.
