Kreu demokrat Lulzim Basha ka ripërsëritur apelin drejtuar Qeverisë për të shtuar testimet, si mënyrën më të suksesshme që po aplikohet për të identifikuar të prekurit nga Covid-19.
Basha ka reaguar lidhur me shërimin e profesot Dhimitër Krajës, i cili u prek nga koronavirusi, vetëm pak ditë pasi iu rikthye shërbimit në spitalin Infektiv, ku pati punuar për 48 vjet.
“Është një lajm i gëzuar për mua personalisht dhe për çdo bashkëqytetar shërimi i Prof. Dhimitër Krajës.
Mendimet dhe lutjet tona shkojnë për të gjithë personelin mjekësor që po përballet sot me COVID-19. Për të gjithë ata mjekë, laborantë, infermierë, sanitarë e shoferë ambulancash që rrezikojnë çdo ditë jetët e tyre në shërbim të qytetarëve.
Në këto ditë të vështira ata meritojnë angazhimin serioz të qeverisë për të siguruar të gjitha mjetet e nevojshme mbrojtëse për ekipet mjekësore.
Transparenca është garanci dhe siguri si për stafet mjekësore ashtu dhe për të gjithë qytetarët. Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit”, shkruan Basha.
